ԴԻՄԵՔ ՃԱՆԱՊԱՐՀՈՐԴԱԿԱՆ ԴՐԱՄԱՇՆՈՐՀԻՆ

Ճանապարհորդական դրամաշնորհ

Հրանտ Դինք հիմնադրամը, համագործակցելով Գյումրու երիտասարդական նախաձեռնությունների կենտրոնի հետ, շարունակում է խրախուսել փակ սահմաններից այն կողմ երկու հարևան երկրների մարդկանց և հաստատությունների միջև կապերի հաստատումն ու ոլորտային գիտելիքների փոխանակումը։  Միացյալ Թագավորության կառավարության Հակամարտությունների, կայունության և անվտանգության հիմնադրամի աջակցության շնորհիվ՝ 2017-2019 թթ «Սահմաններից վեր» ծրագրի շրջանակներում Հայաստան-Թուրքիա ճանապարհորդական դրամաշնորհը կաջակցի 150 անհատի՝ միջսահմանային այցերի միջոցով հարևան երկրում հստակ ծրագրեր իրականացնելու համար`  հոգալով նրանց ճանապարհածախսը։  

Դուք հնարավորություն կստանաք ավելին իմանալ հարևան երկրի մշակույթի մասին, բացահայտել  համագործակցության նոր հնարավորություններ Ձեր մասնագիտության ոլորտում և ապրել սահմաններից վեր գնալու ոգևորությունը: Ճանապարհորդական դրամաշնորհը, որը մեկնարկել է 2014 թ․ ապրիլին Հրանտ Դինք հիմնադրամի կողմից, աջակցություն է տրամադրել 590 անհատի, այդ թվում՝ երաժշտական խմբեր, ճարտարագիտության, միջազգային հարաբերությունների և քաղաքագիտության բաժնի ուսանողներ,  կինոռեժիսորներ, լուսանկարիչներ, երաժիշտներ, հետազոտողներ, խոհանոցային փորձագետներ, ՔՀԿ-ների կամավորներ, ակտիվիստներ ու զանազան հետաքրքրություններով անհատներ և մասնագետներ տարբեր քաղաքներից, ովքեր այցելել են հարևան երկիր Ճանապարհորդական դրամաշնորհի աջակցությամբ։

Ձեր հայտն ուղարկելուց առաջ խնդրում ենք ծանոթանալ Հայաստան-Թուրքիա ճանապարհորդական դրամաշնորհի կանոնակարգին։ Նախկին դրամաշնորհառուների փորձին և տպավորություններին ծանոթանալու համար հետևեք Մարդիկ Սահմաններից Վեր կայքին։ Հավելյալ հարցերի դեպքում կարող եք կապ հաստատել մեզ հետ՝ travelgrant@hrantdink.org էլ հասցեով։

Ես նույնպե՞ս կարող եմ դիմել Հայաստան-Թուրքիա ճանապարհորդական դրամաշնորհին:

Հայաստան-Թուրքիա ճանապարհորդական դրամաշնորհի դիմումները բաց են բոլոր նրանց համար, ովքեր ցանկանում են այցելել հարևան երկիր՝ երկխոսության ընդլայնման և համագործակցության նպատակով: Ճանապարհորդական դրամաշնորհը աջակցություն կտրամադրի այնպիսի բազմաբնույթ նախաձեռնությունների իրագործմանը, ինչպիսիք են   համագործակցության և կապերի հաստատումը, դաշտային հետազոտությունները, միջսահմանային համատեղ ծրագրերը, ծրագրային նախապատրաստական աշխատանքները, փոխանակման ծրագրերը, կրթությունը և լեզվի ուսուցումը, գիտական համագործակցությունը, հետազոտությունը և ատենախոսությունը, քաղաքացիական հասարակության կազմակերպություններում կամավորական աշխատանքը, մշակույթի և արվեստի ոլորտում համատեղ ստեղծագործական աշխատանքները, տարբեր հանդիպումներ, քննարկումներ, սեմինարներ, համաժողովներ, դասընթացներ, ցուցահանդեսներ, համերգներ և վերը նշված թեմատիկ ոլորտներին առնչվող միջոցառումներ կազմակերպելը կամ մասնակցելը:

 


Հայաստան-Թուրքիա ճանապարհորդական դրամաշնորհը իրականացնում է Հրանտ Դինք հիմնադրամը  Գյումրու երիտասարդական նախաձեռնությունների կենտրոնի  հետ համատեղ` Միացյալ Թագավորության կառավարության  Հակամարտությունների, կայունության և անվտանգության հիմնադրամի աջակցությամբ:

#ukcssf